അദ്ദിക്ർ

25: 43-44 സൂക്തങ്ങളില്‍: തന്‍റെ ദേഹേച്ഛയെ ഇലാഹായി തെരഞ്ഞെടുത്തവനെ നീ കണ്ടുവോ? അപ്പോള്‍ നീ അവരുടെ കാര്യങ്ങള്‍ നോക്കുന്നവനാണോ? ഇത്തരം കാഫിറുകളില്‍ അധികപേരും കേള്‍ക്കുകയും ചിന്തിക്കുകയും ചെയ്യുമെന്ന് നീ കണക്കുകൂട്ടുന്നുവോ? നിശ്ചയം, അവര്‍ കന്നുകാലികളെപ്പോലെ അല്ലാതെയല്ല; അല്ല, അവരാണ് ഏറ്റവും വഴിപിഴച്ചവര്‍ എന്ന് പറഞ്ഞിട്ടുണ്ട്.

ചിന്താശക്തി ഉപയോഗപ്പെടുത്തി ജീവിതലക്ഷ്യം മനസ്സിലാക്കാത്ത അറബി ഖുര്‍ആന്‍ വായിക്കുന്ന കപടവിശ്വാസികളും അനുയായികളുമടങ്ങിയ ഫുജ്ജാറുകള്‍ക്ക് കാഴ്ചയും കേള്‍വിയും ബുദ്ധിശക്തിയുമെല്ലാം ഉണ്ടെങ്കിലും അവര്‍ 6: 104 ല്‍ പറഞ്ഞ ഉള്‍ക്കാഴ്ചദായകമായ അദ്ദിക്ര്‍ കാണുകയോ കേള്‍ക്കുകയോ ഇല്ല. ഈ സൂക്തത്തില്‍ അവരെക്കുറിച്ച് കന്നുകാലികളേക്കാള്‍ ഏറ്റവും പിഴച്ച പ്രജ്ഞയറ്റവര്‍ എന്നാണ് വിശേഷിപ്പിച്ചിട്ടുള്ളതെങ്കില്‍, കേള്‍വിയുണ്ടായിട്ടും അദ്ദിക്ര്‍ കേള്‍ക്കാത്ത ബധിരരും സംസാരവൈഭവം ഉണ്ടായിട്ടും അദ്ദിക്റിനെക്കുറിച്ച് ലോകരോട് പറയാത്ത ഊമരുമായ ചിന്താശക്തി ഉപയോഗപ്പെടുത്താത്ത അവരെ 1000 സമുദായങ്ങളില്‍ പെട്ട ജീവികളില്‍ വെച്ച് ഏറ്റവും ദുഷ്ടര്‍ എന്നാണ് 8: 22 ല്‍ വിശേഷിപ്പിച്ചിട്ടുള്ളത്. 

4: 41; 10: 33 സൂക്തങ്ങളില്‍ വിവരിച്ച പ്രകാരം കപടവിശ്വാസികള്‍ അറിഞ്ഞുകൊണ്ട് അദ്ദിക്റിന്‍റെ 40 പേരുകളും മൂടിവെക്കുന്നതിനാല്‍ അവര്‍ നാഥനാല്‍ വധിക്കപ്പെട്ടിരിക്കുന്നു. അതുകൊണ്ട് അവരെ ഇനി ഉണര്‍ത്താന്‍ സാധ്യമല്ല. പ്രജ്ഞയറ്റവരെക്കൊണ്ട് ഉദ്ദേശിക്കുന്നത് കപടവിശ്വാസികളെ പിന്‍പറ്റുന്ന അനുയായികളെയാണ്. അവരെ അദ്ദിക്ര്‍ കൊണ്ട് ഉണര്‍ത്തിയാല്‍ ഉണര്‍ന്നേക്കാം. എന്നാല്‍ ഈ സൂക്തത്തില്‍ പറഞ്ഞ പ്രജ്ഞയറ്റവര്‍ അദ്ദിക്ര്‍ കൊണ്ട് ഉണര്‍ത്തിയിട്ടും ഉണരാത്തവരാണ്. തങ്ങളുടെ ഹൃദയങ്ങളുടെ മേലിലും കേള്‍വിയുടെ മേലിലും കാഴ്ചയുടെ മേലിലും മുദ്രവെക്കപ്പെട്ട പ്രജ്ഞയറ്റവര്‍ എന്ന് 16: 108 ല്‍ പറഞ്ഞതും ഉണര്‍ത്തിയാല്‍ ഉണരാന്‍ സാധ്യതയുള്ള പ്രജ്ഞയറ്റവരെക്കുറിച്ചല്ല; മറിച്ച് ഉണര്‍ത്തിയാലും ഉണരാത്ത ലക്ഷ്യബോധം നഷ്ടപ്പെട്ടവരെക്കുറിച്ചാണ്. 4: 150-151; 9: 67-68 വിശദീകരണം നോക്കുക.